Pumanaw si Kenny Morris, ang orihinal na drummer ng British goth-punk band na Siouxsie and the Banshees, sa edad na 68. Kinumpirma ng matagal nang kaibigan niyang music journalist na si John Robb, sa publikasyong Louder Than War, ang kanyang pagpanaw noong Enero 15. Hindi pa nailalabas ang eksaktong petsa at sanhi ng kanyang pagkamatay.
Sa kanyang pagpupugay, sinabi ni Robb na si Morris ay “nasa puso at kaluluwa ng maagang punk scene.”
Si Kenneth Ian Morris ay ipinanganak sa Essex, England, noong Pebrero 1, 1957. Nag-aral siya ng fine arts at filmmaking sa North East London Polytechnic at Camberwell School of Arts and Crafts.
Bago sumali sa Siouxsie and the Banshees noong 1977, naging miyembro siya ng banda ni Sid Vicious, ang Flowers of Romance, noong 1976.
Nirekord ni Morris ang dalawang album kasama ang Siouxsie and the Banshees: “The Scream” (1978) at “Join Hands” (1979). Kasama rin siya sa debut single ng banda na “Hong Kong Garden,” na umakyat sa ika-7 puwesto sa U.K. singles chart.
Pagkatapos umalis sa banda noong 1979, patuloy siyang nagpatugtog ng drums, nagdirekta ng ilang short films, at nag-eksperimento sa pagpipinta at pagguhit.
Lumipat siya sa Ireland noong 1993 upang mag-aral ng sining at nagtayo ng isang gallery sa Kildare. Kamakailan lamang ay naninirahan siya sa Cork, kung saan siya lumilikha at nagtuturo ng sining.
Pinangalanan niya ang isang art exhibit sa Dublin ng kanyang mga gawa na “A Banshee Left Wailing.” Ito rin umano ang pamagat ng isang memoir na plano niyang ilabas ngayong taon.
Ayón kay Robb, “siya ay mabait, articulate, artistic, at kamangha-manghang kasama, at ang kanyang magandang pagiging kakaiba ay kaibig-ibig.”
ibahagi sa twitter: Pumanaw ang Drummer ng Siouxsie and the Banshees si Kenny Morris sa Edad na 68